ദേവസ്വം ബോർഡ് അംഗങ്ങളെ തിരഞ്ഞെടുത്തു

തിരുവിതാംകൂർ, കൊച്ചി, ദേവസ്വം മലബാർ ബോർഡുകളിലേക്കുള്ള അംഗങ്ങളെ തിരഞ്ഞെടുത്തതായി ദേവസ്വം വകുപ്പ് മന്ത്രി വി.എൻ. വാസവൻ അറിയിച്ചു. തിരുവിതാംകൂർ ദേവസ്വം ബോർഡ് അംഗമായി സന്തോഷ് കുമാർ പി. ഡി, കൊച്ചി ദേവസ്വം ബോർഡ് അംഗമായി കെ.കെ. സുരേഷ് ബാബു, മലബാർ ദേവസ്വം ബോർഡ് അംഗങ്ങളായി ഒ.കെ. വാസു, ഉദയൻ കെ.എൻ എന്നിവരെയുമാണ് തിരഞ്ഞെടുത്തത്. തിരുവിതാംകൂർ, കൊച്ചി, ദേവസ്വം ബോർഡുകളിൽ ഓരോ എസ്.സി/എസ്.റ്റി അംഗങ്ങളുടെയും, മലബാർ ദേവസ്വം ബോർഡിൽ 2 ജനറൽ അംഗങ്ങളുടേയും ഒഴിവുകളാണ് ഉണ്ടായിരുന്നത്. ഈ സ്ഥാനങ്ങളിലേക്കുള്ള അംഗങ്ങളെ നിയമസഭയിലെ ഹിന്ദു MLA-മാർ വോട്ടിങ്ങിലൂടെ തിരഞ്ഞെടുക്കുകയാണ് ചെയ്യുന്നത്.
തിരഞ്ഞെടുപ്പ് നടപടികൾ അനുസരിച്ച് നാമനിർദേശ പത്രിക സമർപ്പണ തീയതിക്കുള്ളിൽ തിരുവിതാംകൂർ, കൊച്ചി ദേവസ്വം ബോർഡുകളിലേക്ക് ഒരോ നാമനിർദേശ പത്രികയും. മലബാർ ദേവസ്വം ബോർഡിലേക്ക് രണ്ടു പേരുമാണ് നാമനിർദേശ പത്രിക സമർപ്പിച്ചത്. സൂഷ്മ പരിശോധനാ നടപടികൾ പൂർത്തിയാക്കി അവരെ വിജയികളായി പ്രഖ്യാപിക്കുകയുമായിരുന്നു. റിട്ട. ജില്ലാ സെഷൻസ് ജഡ്‌ജ് എം. രാജേന്ദ്രൻ നായരായിരുന്നു റിട്ടേണിംഗ് ഓഫീസർ.